Gürcüstanda dəhşətli qətl: Azərbaycanlı qardaşlar güllələndi

Gürcüstanın Saqareco rayonunun azərbaycanlıların yaşadığı Ləmbəli kəndində silahlı hücum baş verib.

APA-ya istinadən verilən məlumata görə, bu insident nəticəsində iki qardaş həlak olub.

Məlumatlara əsasən, kənd sakini odlu silahdan üç qardaşa atəş açıb; onlardan ikisi hadisə yerində vəfat edib, biri isə sağ qalıb.

Yerli sakinlərin dediyinə görə, qardaşlar illər boyu Rusiyada yaşayıblar və kəndə son zamanlarda qayıdıblar.

Hücumun qardaşların qohumlarının toyuna yollandıqları vaxt baş verdiyi qeyd olunur.

Qətlin dəqiq səbəbi hələ müəyyən edilməyibsə də, ehtimal olunan motivlər arasında qisas və uzun illər davam edən münaqişə sayılır.

Qeyri-rəsmi məlumatlara görə, polis hadisədən qısa müddət sonra şübhəli şəxsi saxlayıb.

Gürcüstanın Daxili İşlər Nazirliyi bu insidentlə bağlı hələ açıqlama yaymayıb.